2015 jylǵy 18 mamyr, Astana qalasy
Sý qorǵaý aımaqtary men beldeýlerin belgileý qaǵıdalaryn bekitý týraly
Qazaqstan Respýblıkasynyń 2003 jylǵy 9 shildedegi Sý kodeksiniń 37-baby 1-tarmaǵynyń 22) tarmaqshasyna sáıkes buıyramyn:
1. Qosa berilip otyrǵan Sý qorǵaý aımaqtary men beldeýlerin belgileý qaǵıdalary bekitilsin.
2. Qazaqstan Respýblıkasy Aýyl sharýashylyǵy mınıstrliginiń Sý resýrstary komıteti zańnamada belgilengen tártippen:
1) osy buıryqtyń Qazaqstan Respýblıkasy Ádilet mınıstrliginde memlekettik tirkelýin;
2) osy buıryq Qazaqstan Respýblıkasy Ádilet mınıstrliginde memlekettik tirkelgennen keıin kúntizbelik on kún ishinde onyń kóshirmesiniń merzimdi baspa basylymdarynda jáne «Ádilet» aqparattyq-quqyqtyq júıesinde resmı jarııalaýǵa jiberilýin;
3) osy buıryqtyń Qazaqstan Respýblıkasy Aýyl sharýashylyǵy mınıstrliginiń ınternet-resýrsynda ornalastyrylýyn qamtamasyz etsin.
3. Osy buıryqtyń oryndalýyn baqylaý jetekshilik etetin Qazaqstan Respýblıkasy Aýyl sharýashylyǵy vıse-mınıstrine júktelsin.
4. Osy buıryq alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Aýyl sharýashylyǵy mınıstri A.MAMYTBEKOV
«KELISILGEN»
Qazaqstan Respýblıkasynyń Ulttyq ekonomıka mınıstri ___________ E.Dosaev
2015 jylǵy 4 shilde
«KELISILGEN»
Qazaqstan Respýblıkasy Ishki ister mınıstri ____________ Q.Qasymov
2015 jylǵy 8 maýsym
«KELISILGEN»
Qazaqstan Respýblıkasynyń Energetıka mınıstri ___________ V. Shkolnık
2015 jylǵy 4 maýsym
Qazaqstan Respýblıkasy Aýyl sharýashylyǵy mınıstriniń
2015 jylǵy 18 mamyrdaǵy № 19-1/446 buıryǵymen bekitilgen
Sý qorǵaý aımaqtary men beldeýlerin belgileý qaǵıdalary
1. Jalpy erejeler
1. Osy Sý qorǵaý aımaqtary men beldeýlerin belgileý qaǵıdalary (budan ári – Qaǵıdalar) Qazaqstan Respýblıkasynyń 2003 jylǵy 9 shildedegi Sý kodeksiniń (budan ári – Kodeks) 37-baby 1-tarmaǵynyń 22) tarmaqshasyna sáıkes ázirlendi jáne sý qorǵaý aımaqtary men beldeýlerin belgileý tártibin aıqyndaıdy.
2. Erekshe qorǵalatyn tabıǵı aýmaqtar jeri men memlekettik orman qory quramyna kiretin sý obektilerin qospaǵanda, sý obektilerin jáne sý sharýashylyǵy qurylystaryn sanıtarııalyq-gıgıenalyq jáne ekologııalyq talaptarǵa sáıkes kúıde ustaý, jer ústi sýlarynyń lastanýyn, qoqystanýy men sarqylýyn boldyrmaý, sondaı-aq ósimdikter men janýarlar dúnıesin saqtaý úshin erekshe paıdalaný sharttary bar sý qorǵaý aımaqtary men beldeýleri belgilenedi.
3. Sýdyń lastanýyn, qoqystalýy men sarqylýyn boldyrmaý úshin sharýashylyq qyzmettiń arnaıy rejımi belgilenetin sý obektileri men sý sharýashylyǵy qurylystaryna irgeles aýmaq sý qorǵaý aımaǵy bolyp tabylady.
4. Sý qorǵaý aımaǵy sheginde shekteýli sharýashylyq qyzmet rejımi belgilengen sý obektileri irgeles, aýmaǵynyń eni otyz bes metrden kem emes sý qorǵaý beldeýleri ajyratylady.
5. Sý qorǵaý aımaqtaryn, beldeýlerin jáne olardy sharýashylyqta paıdalaný rejımin oblystardyń (respýblıkalyq mańyzy bar qalanyń, astananyń) jergilikti atqarýshy organdary ýákiletti organmen, qorshaǵan ortany qorǵaý salasyndaǵy ýákiletti memlekettik organmen, halyqtyń sanıtarııalyq-epıdemıologııalyq salaýattylyǵy salasyndaǵy ýákiletti organnyń vedomstvosymen, al sel qaýpi bar aýdandarda – qosymsha azamattyq qorǵaý salasyndaǵy ýákiletti organmen kelisilip, bekitilgen jobalaý qujattamasynyń negizinde belgileıdi.
6. Sý qorǵaý aımaqtary men beldeýlerin jobalaýdy mamandandyrylǵan jobalaý uıymdary júzege asyrady.
Sý qorǵaý aımaqtary men beldeýleriniń jobalaryna jergilikti atqarýshy organdar, al jekelegen sý obektileri (nemese olardyń ýchaskeleri) boıynsha naqty obekt boıynsha sý qorǵaý aımaqtary men beldeýlerin belgileý qajettiligine múddeli jeke jáne zańdy tulǵalar da tapsyrys berýshi bolady.
2. Sý qorǵaý aımaqtaryn belgileý tártibi
7. Árbir jaǵalaý boıynsha sý qorǵaý aımaǵynyń eń tar eni kóp jyldyq mejelik deńgeıi kezindegi sý jıeginen sý tasqyny kezeńindegi kóp jyldyq deńgeıi kezindegi sý jıegine deıingi (ózen jaıylymyn, jaıylym jylǵalaryn, túpki jaǵalaýyndaǵy tik jarlardy, shuńqyrlar men saılardy qosa alǵanda) jáne mynadaı qosymsha qashyqtyqtar qosa eseptelip, belgilenedi:
shaǵyn ózender (uzyndyǵy 200 kılometrge deıin) úshin – 500 metr;
basqa ózender úshin:
sharýashylyqqa paıdalanýdyń qarapaıym jaǵdaılary men sý jınaýdaǵy qolaıly ekologııalyq jaǵdaıynda – 500 metr;
sharýashylyqqa paıdalanýdyń kúrdeli jaǵdaılary men sý jınaýdaǵy qaýyrt ekologııalyq jaǵdaıynda – 1000 metr.
Salalardaǵy sý qoımalary úshin sý qorǵaý aımaǵynyń eń tar eni ol ornalasqan ózendegideı belgilenedi. Sý qorǵaý aımaǵynyń ishki shekarasy qalypty tirelgen deńgeıi kezindegi sý jıegi boıynsha ótedi. Sý quıylatyn sý qoımalary men kólder úshin sý qorǵaý aımaǵynyń eń tar eni sý aıdynynyń akvatorııasy eki sharshy kılometrge deıin – 300 metr jáne akvatorııasy eki sharshy kılometrden acca – 500 metr bolyp belgilenedi. Kólder úshin sý qorǵaý aımaǵynyń ishki shekarasy sýdyń kóp jyldyq deńgeıiniń jaǵalaýlyq shegi boıynsha ótedi.
Sý qorǵaý aımaqtarynyń kórsetilgen kólemderi sý obektisiniń sharýashylyq paıdalaný mańyzy men sıpatyna, sanıtarııalyq-epıdemıologııalyq jaı-kúıine, irgeles aýmaqtar men obektilerdiń jergilikti fızıkalyq-geografııalyq, topyraq, gıdrologııalyq, releftik jáne basqa da jaǵdaılaryna qaraı naqtylanady.
Erekshe qorǵalatyn tabıǵı aýmaqtar men memlekettik orman qorynyń jerlerinde sý qorǵaý aımaǵy jáne sý obektileriniń jaǵalaýlaryndaǵy beldeýler úshin jer ýchaskeleri bólinbeıdi.
Tabıǵı jáne jasandy shepter nemese joǵaryda ornalasqan aýmaqtardan (ózender men saılardyń burmalary, jol-kólik jelisi, tospalar, ormandy alqaptardyń múıisteri) sarqyndy sýlardyń sý obektilerine aǵýy múmkindigin boldyrmaıtyn kedergiler sý qorǵaý aımaǵynyń shekarasy bolady.
3. Sý qorǵaý beldeýlerin belgileý tártibi
8. Sý qorǵaý beldeýleriniń eń tar eni ózen boıy alaptarynyń nysany men tıpi, irgeles dóńderdiń tikeńistigin jaǵalaýlar men aýyl sharýashylyǵy alqaptary quramynyń qaıta óńdelýi boljamyn esepke ala otyryp, aıqyndalady jáne barlyq sý obektileri úshin mynadaı mólsherlerde osy Qaǵıdalarǵa qosymshaǵa sáıkes belgilenedi.
Sý qorǵaý beldeýleriniń mólsheri on jylǵy kezeńdegi jaǵalaýdyń tabıǵı ózgerýiniń enine kóbeıtiledi.
Jaǵalaýynda aǵash-buta nemese qorǵanyshtyq jáne jaǵalaýdy bekitetin qurylystar bolǵan jaǵdaıda qundy aýyl sharýashylyǵy alqaptarynda sý qorǵaý beldeýleri eniniń azaıtylýyna ruqsat etiledi.
9. Eldi mekender sheginde sý qorǵaý beldeýleriniń shekarasy olardy salý men josparlaýdyń naqty jaǵdaılaryn, sý obektisiniń qoqystanýy jáne lastanýyn boldyrmaıtyn jaǵalaý aımaǵyn mindetti túrde ınjenerlik nemese orman-melıorasııalyq jaılastyrýdy (parapetter, oraǵytyp ótý, orman-buta beldeýleri jáne taǵy basqa) eskere otyryp, belgilenedi.
4. Erekshe erejeler
10. Sý qorǵaý aımaqtary men beldeýlerin uıymdastyrý sýdy keshendi túrde paıdalaný men qorǵaý shemalarynda kózdelgen sý jınaýdaǵy sý qorǵaý is-sharalary keshenimen birge júrgiziledi.
11. Sý qorǵaý aımaqtaryn uıymdastyrý sýmen jabdyqtaý, kýrorttyq, saýyqtyrý jáne ózge de halyq muqtajdary úshin paıdalanylatyn sý kózderin sanıtarııalyq qorǵaý aımaqtaryn qurý qajettiligin joqqa shyǵarmaıdy, olardyń shekaralary men mólsherleri Kodekstiń 117-babynyń 2-tarmaǵyna sáıkes belgilenedi.
Sý qorǵaý aımaqtary men beldeýlerin belgileý qaǵıdalaryna qosymsha
Sý qorǵaý beldeýleriniń eń tar eni
Sý obektileri jaǵalaýyna irgeles alqaptar túrleri Dóńderdiń tikeńistigine qaraı sý qorǵaý beldeýiniń eń tar eni (metr)
Jaǵalaýdan eńistigi (nóldik eńistik) Jaǵalaýǵa eńistigi
3 gradýsqa deıin 3 gradýstan astam
Shabyndyq 35 55 100
Kógal, pishendeme 35 50 75
Orman, buta 35 35 55
О́zgeleri (qolaısyz alqap) 35 35 100
Buıryq Qazaqstan Respýblıkasynyń Ádilet mınıstrliginde 2015 jylǵy 4 tamyzda Normatıvtik quqyqtyq kesimderdi memlekettik tirkeýdiń tizilimine №11838 bolyp engizildi.